فیکٹ چیک: فضائی حدود سے متعلق علامہ ناصر عباس کا ویڈیو بیان AI سے تیار کیا گیا

ایران پر امریکہ اور اسرائیل کے حملوں کے بعد سوشل میڈیا پر ایک ویڈیو تیزی سے گردش کر رہی ہے جس میں یہ دعویٰ کیا جا رہا ہے کہ سینیٹ میں اپوزیشن لیڈر علامہ راجہ ناصر عباس نے ایک ٹی وی ٹاک شو کے دوران الزام لگایا ہے کہ امریکہ نے ایران پر حملے کے لیے پاکستان کی فضائی حدود استعمال کیں۔

یہ دعویٰ غلط ہے۔ سینیٹر نے پروگرام کے دوران ایسی کوئی گفتگو یا ریمارکس نہیں دیئے۔

دعویٰ
3 مارچ کو ایکس (ٹوئٹر) پر صارف نے 18 سیکنڈ کا ایک ویڈیو کلپ شیئر کیا، جس میں اپوزیشن رہنما علامہ راجہ ناصر عباس کو ایک نجی نیوز چینل پر انٹرویو دیتے ہوئے دیکھا جا سکتا ہے۔

اس پوسٹ کا کیپشن کچھ یوں تھا: ”پاکستان، ایران پر حملے کے لیے اپنی فضائی حدود امریکہ اور اسرائیل کو دے رہا ہے۔ اس شیعہ رہنما کو سنیں۔“

اس ویڈیو میں علامہ ناصر عباس یہ کہتے ہوئے دکھائی دیتے ہیں کہ: ”میری آرمی کی ٹاپ لیڈر شپ سے کئی مرتبہ بات ہوئی، مگر پھر ہماری فوج نے امریکہ کو اپنا ائیر سپیس استعمال کرنے دیا، یہ بہت غلط ہے، بہت شرمناک ہے، ایران میں جو بھی کچھ ہورہا ہے اس کی ذمہ داری پاکستان پر ہے۔“

اس آرٹیکل کے شائع ہونے تک مذکورہ ویڈیو کو 46 ہزار سے زائد بار دیکھا گیا۔

Pakistan is giving its airspace to the US and Israel to attack Iran.

Listen to this Shia leader who holds PakistanArmy responsible: pic.twitter.com/vef4DZowQQ

— THE UNKNOWN MAN (@Theunk5555) March 3, 2026

حقیقت
علامہ راجہ ناصر عباس نے اس انٹرویو کے دوران پاکستان کی فضائی حدود کے امریکہ کی جانب سے استعمال ہونے سے متعلق کوئی تبصرہ نہیں کیا۔ درحقیقت، یہ پروگرام 2024 میں نشر ہوا تھا، جو رواں برس فروری میں ایران پر ہونے والے امریکی اور اسرائیلی حملوں سے بہت پہلے کی بات ہے۔

انٹرنیٹ پر گردش کرنے والا یہ کلپ علامہ ناصر عباس کے ایک نجی نیوز چینل کو 27 جولائی 2024 کو دیے گئے انٹرویو سے لیا گیا ہے۔ جیو فیکٹ چیک نے اس اصل ریکارڈنگ کا جائزہ لیا ہے جو کہ 40 منٹ سے زیادہ طویل ہے۔ اس پوری گفتگو کے دوران سیاسی رہنما نے کہیں بھی امریکہ کی جانب سے پاکستان کی فضائی حدود استعمال کیے جانے کا ذکر نہیں کیا۔

مکمل انٹرویو یہاں دیکھا جا سکتا ہے۔

جیو فیکٹ چیک نے یونیورسٹی ایٹ بفیلو کے ٹول ڈیپ فیک او میٹر (DeepFake-o-Meter) کے ذریعے بھی اس وائرل کلپ کا تجزیہ کیا۔ اس ٹول کے نتائج میں ویڈیو کے جعلی ہونے کا امکان 99.7 فیصد ظاہر کیا گیا، جو اس بات کی واضح نشاندہی ہے کہ یہ ویڈیو مصنوعی ذہانت (AI) کے ذریعے تیار کی گئی ہے۔

اس کے علاوہ، آرٹیفیشل انٹیلیجنس (AI) مواد کی شناخت کرنے والے پلیٹ فارم ہائیو ماڈریشن (Hive Moderation) نے بھی اس ویڈیو کلپ کو 99.7 فیصد کا مجموعی اسکور دیا ہے، جو اس بات کی تصدیق کرتا ہے کہ یہ مواد مصنوعی ذہانت کے ذریعے تیار کیا گیا ہے۔