ڈی پی او مظفرگڑھ کا محرم کی سیکیورٹی کو لے کر امن کمیٹی اور لائسنس داران سے مشاورت
مظفرگڑھ: پرامن محرم الحرام کے لیے ڈی پی او کی امام بارگاہوں کے لائسنس داران اور امن کمیٹی سے اہم میٹنگ
امید نیوز – مظفرگڑھ ضلع پولیس سربراہ ڈاکٹر رضوان خان نے پرامن محرم الحرام کے قیام کو یقینی بنانے کے لیے امام بارگاہوں کے لائسنس داران اور امن کمیٹی کے اراکین کے ساتھ اہم میٹنگ کی۔ میٹنگ میں ڈی ایس پی صدر سرکل مرزا محمد صدیق سمیت تھانہ خانگڑھ، شاہجمال، قریشی اور روہیلانوالی کے اسٹیشن ہاؤس آفیسرز بھی شریک تھے۔
ڈی پی او مظفرگڑھ نے میٹنگ کے دوران جلوسوں کے روٹس اور ممکنہ مسائل پر تفصیلی تبادلہ خیال کیا۔ انہوں نے لائسنس داران اور امن کمیٹی کے اراکین پر زور دیا کہ وہ پرامن محرم الحرام کے قیام میں پولیس کے ساتھ مکمل تعاون کریں۔
ڈاکٹر رضوان خان نے پولیس افسران کو ہدایات جاری کرتے ہوئے کہا کہ تمام مجالس و جلوسوں کی نگرانی کے لیے تھری لیئر سیکورٹی اور روف ٹاپ ڈیوٹیز کو یقینی بنایا جائے۔ انہوں نے بتایا کہ محرم الحرام کے حوالے سے تمام سیکورٹی پلان اور اقدامات حتمی شکل دے دیے گئے ہیں۔
ڈی پی او نے کہا کہ "پرامن محرم الحرام کے قیام کے لیے ہم تمام تر وسائل بروئے کار لائیں گے۔ ہماری پوری ٹیم الرٹ ہے اور کسی بھی ناخوشگوار واقعہ سے نمٹنے کے لیے تیار ہے۔”
میٹنگ کے بعد ڈی پی او مظفرگڑھ نے ڈی ایس پی صدر سرکل آفس میں تعمیر ہونے والی نئی بلڈنگ کا افتتاح بھی کیا۔ اس موقع پر تمام شرکاء نے پرامن محرم الحرام کی خواہش کا اظہار کیا۔
ضلعی انتظامیہ اور پولیس کی جانب سے یقین دلایا گیا ہے کہ محرم الحرام کے تمام تقاریب کو پرامن طریقے سے منعقد کرانے کے لیے ہر ممکن اقدامات کیے جا رہے ہیں۔
About The Author
