مظفرگڑھ: گنیش واہ نہر میں شگاف، ریسکیو اور آبپاشی کے عملے کی ہنگامی کوششیں جاری

مظفرگڑھ میں گنیش واہ نہر میں شگاف پڑنے سے ہنگامی صورتحال، ریسکیو 1122 اور محکمہ آبپاشی کی مشترکہ کارروائیاں جاری

ریسکیو 1122 کنٹرول روم مظفرگڑھ کو 8 جون 2025 کو صبح 5:38 بجے اطلاع موصول ہوئی کہ بستی چونیاں کے قریب گنیش واہ نہر میں شگاف پڑ گیا ہے۔ شگاف کی چوڑائی تقریباً 10 فٹ بتائی گئی جس کی وجہ سے پانی زرعی زمینوں اور مقامی آبادی میں داخل ہو رہا تھا۔

ریسکیو ٹیمیں فوری طور پر ایم جی اے-17، ایم جی آر-01 اور ایم جی بی-40 گاڑیوں کے ذریعے واقعہ مقام پر پہنچ گئیں، جہاں ایم جی بی-40 نے صرف 4 منٹ 46 سیکنڈ میں رسپانس دے دیا۔ نہر کی چوڑائی 35 سے 40 فٹ جبکہ گہرائی 8 فٹ کے قریب ہے۔

اسسٹنٹ کمشنر مظفرگڑھ کی ہدایات پر ریسکیو سٹاف نے محکمہ اریگیشن کے اہلکاروں کے ساتھ مل کر مٹی ڈال کر شگاف بند کرنے کی کوششیں شروع کر دی ہیں۔ پولیس کنٹرول، اریگیشن کنٹرول اور ڈسٹرکٹ ایمرجنسی آپریشنز سینٹر کو بھی اس واقعہ سے آگاہ کر دیا گیا ہے۔

تمام معلومات پنجاب ایمرجنسی سروس کے کنٹرول روم مظفرگڑھ کی جانب سے فراہم کی گئی.