7 سالہ خدیجہ نہر میں ڈوب کر لاپتہ، ریسکیو آپریشن مسلسل جاری

7 سالہ خدیجہ تلیری نہر میں ڈوب کر لاپتہ،بچی کی تلاش کے لیے ریسکیو ٹیم کی مسلسل کوششیں، اب تک کوئی سراغ نہیں

امید نیوز مظفر گڑھ – صوبائی ایمرجنسی سروس کے کنٹرول روم کو 9 جون 2025 کو رات 9 بج کر 6 منٹ پر ایک ہنگامی کال موصول ہوئی، جس میں بتایا گیا کہ تھٹہ قریشی کے نزدیک مینڈا چوک، شرعی والی پُل کے قریب 7 سالہ بچی خدیجہ بنت آصف تلیری نہر کے کنارے کھیلتے ہوئے پھسل کر نہر میں گر گئی اور ڈوب کر لاپتہ ہو گئی۔

ایمرجنسی سروس نے واقعے کی اطلاع ملتے ہی 3 ایمبولینسز (MGA-12, MGA-26, MGT-01) اور واٹر سرچ اینڈ ریسکیو ٹیم کو بحالی کشتی (MZGB-01) کے ساتھ موقع پر روانہ کیا۔ ریسکیو ٹیم نے 24 منٹ 32 سیکنڈ میں رURAL ایریا میں پہنچ کر سرچ آپریشن شروع کیا۔ ابتدائی طور پر عینی شاہدین سے معلومات حاصل کی گئیں، لیکن مستند شواہد نہ مل سکے۔

پہلے دن سپر وائزری اور لائن سرچ تکنیک کے ذریعے تقریباً 1 کلومیٹر تک کا علاقہ چھان مارا گیا، مگر بچی کا کوئی سراغ نہ ملا۔ رات کی تاریکی کی وجہ سے سرچ آپریشن عارضی طور پر روکنا پڑا۔ 10 جون کو صبح سویرے ڈسٹرکٹ ایمرجنسی آفیسر انجینئر عبید اللہ کی ہدایت پر انسیڈنٹ کمانڈ پوسٹ قائم کی گئی اور کمیونٹی ایمرجنسی رسپانس ٹیم کے تعاون سے دوبارہ سرچ کا آغاز کیا گیا۔ لائن سرچ اور بوٹ پیٹرولنگ ٹیکنیک استعمال کرتے ہوئے 3 کلومیٹر تک کا ایریا چھانا گیا، لیکن اب تک بچی کی لاش برآمد نہیں ہو سکی۔

لاپتہ بچی خدیجہ بنت آصف کی عمر 7 سال ہے اور وہ بستی رامے والا، تھٹہ قریشی، مظفر گڑھ کی رہائشی ہے۔ حادثہ پیش آنے والی نہر کی چوڑائی 35 سے 40 فٹ جبکہ گہرائی 8 سے 10 فٹ بتائی جاتی ہے۔ سرچ آپریشن میں لائن سرچ اور بوٹ پیٹرولنگ جیسی تکنیکوں کا استعمال کیا جا رہا ہے۔ انسیڈنٹ کمانڈر سیفدار عباس (سب انسپکٹر) کی نگرانی میں واٹر سرچ اینڈ ریسکیو ٹیم کا آپریشن جاری ہے اور مزید علاقے کی چھان بین کی جا رہی ہے۔ ضلعی انتظامیہ اور مقامی کمیونٹی کی مدد سے سرچ کا دائرہ وسیع کیا جا رہا ہے۔