سیلابی پانی کے جنوبی پنجاب میں داخل ہونے کے بعد ایڈیشنل چیف سیکرٹری کا مظفرگڑھ میں ہنگامی دورہ، انسانی جان کو بچانا اولین ترجیح

ایڈیشنل چیف سیکرٹری فواد ربانی کا اعلان: ریسکیو عمل مکمل، عوام خوفزدہ نہ ہوں لیکن الرٹ رہیں، پاک فوج کی مکمل سپورٹ حاصل

تفصیلات: مظفرگڑھ( امید نیوز ) دریائے چناب میں بڑھتے ہوئے سیلابی پانی کے جنوبی پنجاب میں داخل ہونے کے پیش نظر ایڈیشنل چیف سیکرٹری فواد ہاشم ربانی نے آج مظفرگڑھ کا ہنگامی دورہ کیا۔ انہوں نے دوآبہ کے مقام پر ریسکیو اور ریلیف سرگرمیوں کا جائزہ لیا۔

ایڈیشنل چیف سیکرٹری نے مقامی انتظامیہ کے اہلکاروں کے ساتھ بریفنگ کے دوران کہا کہ جنوبی پنجاب کی انتظامیہ اور عوام کو سیلاب کے چیلنج کا سامنا ہے، جس سے نمٹنے کے لیے تدبیر اور بہترین حکمت عملی اختیار کی گئی ہے۔ ان کا کہنا تھا کہ "ہماری اولین ترجیح انسانی جان کو محفوظ بنانا ہے اور سیلاب زدہ علاقوں سے عوام کا انخلاء کامیابی سے مکمل کر لیا گیا ہے۔”

فواد ربانی نے عوام سے کہا کہ وہ خوفزدہ نہ ہوں لیکن الرٹ رہیں۔ انہوں نے کہا کہ حکومت ریسکیو اور ریلیف کے لیے تمام وسائل استعمال کر رہی ہے اور سیلاب سے نمٹنے کے لیے پاک فوج کی مکمل سپورٹ حاصل ہے۔

انہوں نے دریائے چناب کے موجودہ پانی کے بہاؤ کو 4 لاکھ 46 ہزار کیوسک بتاتے ہوئے کہا کہ ہیڈ محمد والا کی استعداد 8 لاکھ کیوسک جبکہ ہیڈ پنجند کی استعداد 8 لاکھ 65 ہزار کیوسک ہے، جو کہ موجودہ بہاؤ سے کہیں زیادہ ہے۔

ایڈیشنل چیف سیکرٹری نے انتظامیہ کو ہدایت کی کہ کیمپوں میں رہائش پذیر سیلاب متاثرین اور بچوں کو کھانا اور دودھ بروقت فراہم کیا جائے۔

دوسری جانب ڈسٹرکٹ کوآرڈینیٹر مظفرگڑھ محمد عثمان طاہر جپہ نے بریفنگ دی کہ ضلع میں 22 فلڈ ریلیف کیمپ قائم کیے گئے ہیں، جن میں سے 6 فی الحال فعال ہیں۔ ان میں سے 6 کیمپ سرکاری سکولوں میں قائم کیے گئے ہیں۔ کیمپوں میں پانی، بجلی، ٹائلٹس سمیت تمام بنیادی سہولیات دستیاب ہیں اور متاثرین کو تین وقت کھانا فراہم کیا جا رہا ہے۔ انہوں نے بتایا کہ ریسکیو کا عمل مکمل ہو چکا ہے۔

اس موقع پر کمشنر ڈی جی خان اشفاق احمد چوہدری، آرپی او ملتان سہیل چوہدری، ایم پی اے اجمل چانڈیہ، سپیشل سیکرٹری زراعت سرفراز مگسی، سپیشل سیکرٹری ایریگیشن اعجاز خالق رزاقی، سپیشل سیکرٹری سی اینڈ ڈبلیو آفتاب پیرزادہ، ڈی پی او غضنفر، ایڈیشنل سیکرٹری عبدالصبور ٹھاکر اور پی ایس او غلام سرور بھی موجود تھے۔ چیف انجینئر ایریگیشن اور ڈسٹرکٹ ایمرجنسی آفیسر ریسکیو نے بھی بریفنگ دی۔